पालकमंत्रींच्या आश्वासनाची अंमलबजावणी न झाल्याने धुळ्यात उपोषण; 'भारतीय संविधान सेना' आक्रमक

 पालकमंत्रींच्या आश्वासनाची अंमलबजावणी न झाल्याने धुळ्यात उपोषण; 'भारतीय संविधान सेना' आक्रमक

**धुळे, 8 सप्टेंबर 2026* | MJW न्यूज मराठी |

 धुळे महानगरपालिका प्रशासनाने पालकमंत्री श्री. जयकुमार रावल यांच्या आश्वासनाकडे दुर्लक्ष केल्याचा आरोप करत 'भारतीय संविधान सेना'ने आजपासून धुळ्यातील 'जेल रोड आंदोलन भूमी'वर आमरण व साखळी उपोषण सुरू केले आहे.

पालकमंत्री जयकुमार रावल यांनी 15 ऑगस्ट 2026 रोजी शहरातील वाढते अतिक्रमण, रस्त्यावरील बेकायदेशीर बांधकामे आणि नागरिकांच्या मूलभूत हक्कांबाबत दिलेल्या सर्व मागण्या कायदेशीररित्या पूर्ण करण्याचे आश्वासन दिले होते. मात्र 20 दिवसांहून अधिक काळ लोटूनही प्रशासनाने कोणतीही ठोस कारवाई न केल्याने कार्यकर्त्यांमध्ये तीव्र नाराजी आहे.

भारतीय संविधान सेनेचे अध्यक्ष आनंद लोंढे यांनी दिलेल्या प्रेस नोटमध्ये म्हटले आहे की, "प्रशासनाच्या या टाळाटाळीमुळे पालकमंत्रींच्या शब्दाचा अवमान झाला आहे. मनपा आयुक्त कुणाच्या दबावात आहेत, हे स्पष्ट करावे."

प्रमुख मागण्या:

1. बाबासाहेब कोतवाल ट्रस्टचे अवैध बांधकाम निष्कासित करणे - 9 मीटर सार्वजनिक रस्त्यावरील बेकायदेशीर आरसीसी/कॉमर्शियल बांधकाम तात्काळ पाडावे

2. जेल रोड आंदोलन भूमी मोकळी करणे - पुनर्वसनाच्या नावाखाली उभारलेले 12x40 ते 12x80 चे अवैध शेड हटवावेत

3. जुन्या मनपा मागील गेट मोकळे करणे - अतिक्रमण हटवून महिला व नागरिकांसाठी रस्ता खुला करावा  

4. महामार्ग व शहर अतिक्रमणमुक्त करणे - मुंबई-आग्रा महामार्ग व शहरातील प्रमुख रस्त्यावरील अतिक्रमे हटवावीत

5. मूलभूत सोयी - आंदोलन स्थळी पिण्याचे पाणी व महिलांसाठी स्वच्छतागृहाची सोय करावी

उपोषणात प्रदेश प्रवक्ते संतोष पंढरीनाथ अमृतसागर आणि संविधान सैनिक दावल वाघ हे आमरण उपोषणाला बसले आहेत. आज उपोषणाचा दुसरा दिवस आहे.

संघटनेने प्रशासनाला 3 दिवसांचा अल्टिमेटम दिला असून, या काळात मागण्या पूर्ण न झाल्यास धुळे मनपाविरोधात तीव्र आंदोलन छेडण्याचा इशारा दिला आहे.

*प्रतिनिधी:* MJW न्यूज मराठी, धुळे