मनोज जरांगे यांच्या उपोषणाला पाठिंबा; धुळ्यात 9 सप्टेंबरला रस्ता रोको, 12 ला आंतरवालीकडे कूच - सकल मराठा समाज

 मनोज जरांगे यांच्या उपोषणाला पाठिंबा; धुळ्यात 9 सप्टेंबरला रस्ता रोको, 12 ला आंतरवालीकडे कूच - सकल मराठा समाज

*धुळे, 8 सप्टेंबर 2026* | MJW न्यूज मराठी | मराठा संघर्ष योद्धा श्री. मनोज दादा जरांगे पाटील यांच्या आंतरवाली सराटी येथील उपोषणाला पाठिंबा देण्यासाठी सकल मराठा समाज, धुळे जिल्ह्याने आक्रमक भूमिका घेतली आहे. सरकारने दिलेले आश्वासन पूर्ण न केल्याने जरांगे पाटील यांनी पाणी व वैद्यकीय उपचार नाकारले असून, त्यांच्या प्रकृतीबाबत समाजात तीव्र चिंता व्यक्त होत आहे.

सकल मराठा समाज, धुळे च्या वतीने काढलेल्या पत्रकात म्हटले आहे की, "दादांच्या प्रकृतीला जर जास्त त्रास झाला तर एकही मराठा घरात बसणार नाही. सर्व समाज रस्त्यावर उतरून आक्रमक होईल."

समाजाच्या प्रमुख मागण्या:

1. लोकप्रतिनिधींनी भूमिका स्पष्ट करावी - धुळे जिल्ह्यातील सर्व मंत्री, खासदार, आमदार, नगरसेवक, जिल्हा परिषद सदस्य यांनी मराठा आरक्षणाबत भूमिका जाहीर करून लेखी पत्र मुख्यमंत्रींना द्यावे

2. आंदोलनात सक्रिय सहभाग - यापुढे होणाऱ्या मराठा आंदोलनात सर्व लोकप्रतिनिधींनी सामील व्हावे

3. त्वरित निर्णयाची मागणी - सरकारने मराठा समाजाच्या प्रलंबित मागण्या तात्काळ मान्य कराव्यात

आंदोलनाचा कार्यक्रम:

- दि. 9/9/26, बुधवार: सकल मराठा समाज, धुळे जिल्हा तर्फे जिल्हाभरात रस्ता रोको आंदोलन करण्यात येणार

- दि. 12/9/26: धुळे जिल्ह्यातून मोठ्या संख्येने समाज बांधव आंतरवाली सराटी येथे जाणार. दादांच्या आदेशानुसार तेथून मुंबई कडे जाण्याबाबत व आंदोलनाची पुढील दिशा ठरवण्यात येईल

समाजाने धुळे शहरासह शिरपूर, शिंदखेडा, दोंडाईचा, साक्री, पिंपळनेर, धुळे ग्रामीण या सर्व तालुक्यांतील मराठा बांधवांना मोठ्या संख्येने सहभागी होण्याचे आवाहन केले आहे.

पत्रकात म्हटले आहे की, "सरकार जर मागण्यांकडे दुर्लक्ष करत असेल तर मराठा समाज 'घरी बसला तो मराठा कसला, मराठा जागा हो आरक्षणाचा धागा हो, अभी नही तो कभी नही' या घोषणांनी सरकारला हादरवून सोडेल."

मराठा समाजाच्या मुलांना शिक्षण, नोकरी व व्यवसायात आरक्षण मिळावे यासाठी ही लढाई असल्याचे समाजाने स्पष्ट केले आहे.

*प्रतिनिधी:* MJW न्यूज मराठी, धुळे